Бізнес-місія дэлегацыі Рэспублікі Беларусь у Ашхабад, Туркменістан

У перыяд з 16 па 20 сакавіка 2024 г. Мінскае аддзяленне Беларускай гандлёва-прамысловай палаты сумесна з Пасольствам Рэспублікі Беларусь у Туркменістане і пры падтрымцы Саюза прамыслоўцаў і прадпрымальнікаў Туркменістана і Гандлёва-прамысловай палаты Туркменістана арганізавалі бізнес-місію прадпрыемстваў Рэспублікі Беларусь у г. Ашхабад.

Візіт праходзіў у рамках правядзення Міжнароднай выставы з нагоды 16-годдзя ўтварэння Саюза прамыслоўцаў і прадпрымальнікаў Туркменістана. У склад беларускай дэлегацыі ўвайшлі 8 прадпрыемстваў.

У мэтах пашырэння супрацоўніцтва паміж прадпрыемствамі Рэспублікі Беларусь і Туркменістана былі праведзены двухбаковыя перагаворы на палях выставы, а таксама арганізаваны наведванні прадпрыемстваў. Беларускія прадпрыемствы правялі перагаворы на прадмет рэалізацыі ўласнай прадукцыі: будаўнічай, дарожнай і камунальнай тэхнікі; гуматэхнічных вырабаў, піламатэрыялаў, каўбасных вырабаў, паперы, сшыткаў, алкагольнай прадукцыі. Абмеркаваны пытанні ўзаемадзеяння ў рамках біржавых таргоў, а таксама ўдзел туркменскіх і беларускіх прадпрыемстваў у маючых адбыцца кангрэсных і выставачных мерапрыемствах на тэрыторыі дзвюх краін.