Беларускі бізнес умацоўвае пазіцыі на рынку Туркменістана: вынікі дзелавога візіту

Дэлегацыя дзелавых колаў Рэспублікі Беларусь завяршыла візіт у Ашхабад, арганізаваны Мінскім аддзяленнем Беларускай гандлёва-прамысловай палаты сумесна з Гандлёва-прамысловай палатай Туркменістана. Вынікам місіі стала дасягненне шэрагу канкрэтных дамоўленасцяў у сферы харчовай, мэблевай, дрэваапрацоўчай прамысловасці, а таксама ў галіне прыборабудавання і медыцынскіх тэхналогій.

Візіт быў прымеркаваны да працы XXV Міжнароднай выставы і канферэнцыі «Белы горад Ашхабад – 2026», на якой беларускі бок правёў серыю адрасных B2B-перамоў з вядучымі туркменскімі прадпрыемствамі, арыентаванымі на знешнеэканамічную дзейнасць.

У рамках візіту таксама адбыліся перамовы з кіраўніцтвам ГПП Туркменістана, прадстаўнікамі профільных міністэрстваў і ведамстваў, а таксама з кіраўнікамі мясцовых прадпрыемстваў.

Вынікам перамоў стала дасягненне дамоўленасцяў аб пастаўках у Туркменістан беларускай мэблі, міжпакаёвых дзвярэй, медтэхнікі і танометраў. Акрамя таго, Туркменскі бок выказаў высокую зацікаўленасць у закупках беларускіх ДВП, ДСП і ДДФ. Таксама дэталёва прапрацоўваюцца пытанні экспарту беларускай цэлюлозы і сучасных сістэм вулічнага асвятлення.

Важнай часткай праграмы стала сустрэча ўдзельнікаў беларускай дэлегацыі з Надзвычайным і Паўнамоцным Паслом Рэспублікі Беларусь у Туркменістане Станіславам Чапурным. Бакі прадметна абмеркавалі практычныя магчымасці і спецыфіку вядзення бізнесу ў Туркменістане, пытанні нарошчвання ўзаемных паставак тавараў.